Di gotara xwe ya li ser Rojhilata Navîn de, Serok Obama bi berfirehî li ser Sûrîyê peyîvî. Serok Obama rastexwe ji Serokê Sûrîyê Beşar Esed re axîfî û got, “Ya pêşangîya guherînê bike, yan jî li pêş rêya guherînê derkeve”.
Serok Barack Obama wiha berdewam kir:
“Li şûna ku guh bide daxwazîya gelê xwe, rejîma Sûrî rêya qirkirin û binçavkirina gelê sîvîl bijart. Welatên Yekbûyî yên Amerîka van kiryarana şermezar kirin û bi hevkarîya civata navnetewî me ceza û toleyên aborî li hember rejîma Sûrî danan, ku Serok Beşar El Esed jî nav de ye.
Gelê Sûrî wêrekîya xwe nîşan da û daxwaza guherîn û demokrasîyê dike. Divê Serok Esed rêya xwe bijêre: Ew dixwaze rêberîya guherînê bike, yan xwe ji pêşîya daxwazên guherînê paşve bikşîne?
Divê hikûmeta Sûrî dest ji gulebarandina gelê sîvîl berde û rê li ber xwepêşandanên aşîtîyane veke, girtîyên sîyasî azad bike, dawî li binçavkirinên kefyî berde û destûr bide çavdêrên sîyasî ku xwe bigehînin bajarên wek Daraa û rewşa heyî di cîhê de bibînin.
Rejîma Sûrî divê jibo guherîneke demokratîk û pêşveçûnê dest bi dîyalogê bike. Heku ne, rejîma Serok Esed dê li hindûrê welat rûberî dijberên xwe be û li derva jî rûbirûyê tenê mayînê be.
Heta niha Sûrîye, Îranê ji xwe re kir mînak û ji Tehranê alîkarî werdigire ku çawa xwepêşandanan bieciqîne. Ev yek jî durûtîya Îranê nîşan dide ku dibêje, ew piştevanîya xwepêşandanên li dervayê dike, lê bi xwe jî gelê xwe serkut dike.”